President

«Ina baselgia da gronda muntada per la Surselva»

En discuors cun Pieder Decurtins, president dalla Pleiv catolica romana Trun.

Pieder Decurtins, la baselgia da Nossadunna dalla Glisch ei ina perla ella cuntrada ecclesiastica e historica dalla Surselva. Tgei relaziun haveis Vus persunalmein cun quei sanctuari?

Da buob hai jeu stuiu ir bia ga si Nossadunna. Quei ha dau a mi ina relaziun persunala speciala cun quei liug. Acladira e sia baselgia da Nossadunna dalla Glisch ei effectivamein in liug special. Bein pusseivel che quella baselgia vegn puspei ad esser in di ina dallas pli frequentadas cheu tier nus sper la baselgia claustrala a Mustér.

Tgei muntada ha quella baselgia per la Pleiv catolica romana s. Martin?

Per la pleiv ha quei sanctuari secapescha ina fetg gronda muntada. Ils survetschs divins vegnan purschi oz da sur Tomasz Piotr Drwal. El ei denton buca mo responabels pils survetschs a Nossadunna dalla Glisch, mobein per la pastoraziun pigl entir intschess dalla vischnaunca da Trun, pia Trun, Schlans e Zignau. Quei ei secapescha in grond buordi. Il temps per far dapli – per exempel si Nossadunna – maunca deplorablamein.

Uss ei la renovaziun externa sin rucca. Ella ei ina gronda sfida e munta fetg bia lavur. Co vul la pleiv dumignar quei pensum enteifer in aschi cuort temps?

Quei project ei ina gronda sfida. Nus essan denton perschuadi da dumignar quella el temps previu, pia entochen la fin digl onn vegnent. Quei optimissem havein nus era perquei che pliras instituziuns han gia sincerau a nus in bien sustegn finanzial. Aschia il Corpus catolicum, la Tgira da monuments ni era la vischnaunca da Trun. L’entschatta settember vegn repartiu ell’entira Surselva in flyer cun in clom per donaziuns. Mintga contribuziun – aunc aschi pintga – ei in agid per nus. Parallelmein vegnin nus a spluntar era tier autras instituziuns ed organisaziuns.

En sesez deriva quei entir project dalla part davostier dil tetg. Quella ei vegnida realisada avon rodund 30 onns, mo il material ha buca teniu. Aschia ei penetrau aua egl intern e quella  ha entschiet a far donn dalla substanzia dil baghetg. Nus havein viu la necessitad d’intervegnir ed essan lu sedecidi da remplazzar igl entir tetg sco era da sanar ils mirs, pia far ina renovaziun externa totala en quei connex. Da basegns d’ina renovaziun ha era il clutger. La pareta che la baselgia fa ussa ei buca fetg biala ed ella mereta ina frestgentada e lavurs ch’impedeschan ulteriurs donns. En quei connex lessen nus era installar in indrez d’illuminaziun cun LED, per aschia sclarir la baselgia la notg. Parallelmein duei il plaz all’entrada dalla baselgia vegnir sanaus ed ina finamira ei segiramein era d’allontanar empau cagliom entuorn la baselgia per che quella seigi meglier veseivla si dalla val igl avegnir.

Nossadunna dalla Glisch ad Acladira era in liug da pelegrinadi. Dat ei eventualmein ideas co reactivar quei pelegrinadi?

Il pelegrinadi s’auda deplorablamein daditg al vargau. Ei fuss secapescha il giavisch che quel pudess vegnir reactivaus. Quei ei denton buca aschi sempel. La suprastonza dalla Pleiv catolica romana Trun ei lundervi da far ponderaziuns co promover danovamein il pelegrinadi ad Acladira.